"Haustmorðinginn ljúfi, eins og sumir kalla hana. Munro Killer er nefnilega einstaklega góð haustfluga þegar birkið hefur skipt litum og gulir og rauðir tónar taka yfir. Ekki hika samt við að prófa hana um hásumarið því hún er of falleg til að sitja aðgerðarlaus í boxinu.
Þessi ljúfi launmorðingi kom fyrst fram á sjónarsviðið á bökkum Spey árinnar í Skotlandi, nánar tiltekið í bænum Aberlour. John Milne Morrisson rak verslunina J.M.J. Munro, sem seldi meðal annars allt til laxveiða. Sagan segir að fyrirmyndin hafi verið Thunder and Lightning, enda sami búkur í þeirri flugu, en allt annað er öðruvísi. Sigurður Héðinn skrifaði um fluguna í bókinni Sá stóri, sá missti og sá landaði og segir þar m.a. „Upprunalega útgáfan var með löngum væng, sem þótti nýlunda á þessum tíma og gerði fluguna ógnarvinsæla á örskömmum tíma.“ Þetta verða að kallast athyglisverðar upplýsingar því hún er nánast alltaf og undantekningalaust með stuttum væng í dag. Hmmm!
"