Það hafa líklega fáir lýst þessari flugu jafnvel og Karl Lúðvíksson en hann skrifaði á vísi.is: Þessi fluga hefur reynst veiðimönnum feykilega vel og ástæðan er sú að hún þykir líkja einna best eftir hornsíli sem er ein aðalfæða urriðans í vatninu.

Best þykir að leyfa henni að sökkva vel og draga hana svo inn í stuttum hröðum rykkjum með stuttri hvíld á milli en þessi hreyfing líkir eftir hreyfingu hornsílis. Ef það er stór urriði í nágrenninu sem lætur blekkjast er ekki beint hægt að segja að þú fáir töku. Þegar 15-20 punda urriði stekkur á þessa flugu er frekar hægt að líkja því við að kasta flugu við þjóðveginn og festa hana í mótorhjóli sem þýtur framhjá þér á 100 km hraða. Vertu bara viðbúin/n/ð og með næga undirlínu.